Instagram ដែលមានតំលៃ 1 ពាន់លានដុល្លារមិនទាន់រកចំនូលបាននៅឡើយទេ

ចាន់ វណ្ណា (HeNa) October 12, 2013

Instagram គឺជាប្រព័ន្ធបណ្តាញសង្គមមួយក្នុងចំណោមប្រព័ន្ធបណ្តាញសង្គមផ្សេង ទៀតមានដូចជា Facebook, Twitter, Hi5, G-Plus -ល-។ Instagram ត្រូវបានបង្កើតឡើងនៅក្នុងឆ្នាំ 2010 ហើយត្រូវបានក្រុមហ៊ុន Facebook ទិញយកនៅក្នុងឆ្នាំ 2012 ដែលមានតំលៃប្រមាណ 1 ពាន់លានដុល្លារសហរដ្ឋអាមេរិក។

តាំងពី Instagram ត្រូវបានគ្រប់គ្រងដោយក្រុមហ៊ុន Facebook មកវាមិនទាន់រកចំនូលឲ្យម្ចាស់ថ្មីនេះបាននៅឡើយទេ។ នេះបើយោងតាមប្រភពរបស់ BBC។ បន្ថែមពីលើនេះទៀត BBC បានចង្អុលប្រាប់ថា Instagram ដែលមានអតិថិជនប្រើប្រាស់ប្រមាណ 150 លាននាក់ មួយនេះបានប្រកាសថាខ្លួននឹងចាប់ផ្តើមចេញប្រតិបត្តិការណ៍វាយ ដណ្តើមទីផ្សារ ពីប្រព័ន្ធបណ្តាញសង្គមផ្សេងៗទៀត ដែលរកចំនូលបាននៅលើការផ្សព្វផ្សាយពាណិជ្ជកម្ម Online នាចុងឆ្នាំ 2014 នេះ ហើយអតិថិជនតាំងអស់នៅតែទទួលបានការប្រើប្រាស់ដោយឥតគិតថ្លៃ ដដែល។

សូមគូសបញ្ជាក់ផង ដែរថា Facebook បានខិតខំប្រឹងប្រែងយ៉ាងខ្លាំងចំពោះការវាយដណ្តើមទីផ្សារនេះ ព្រោះថាក្រោមការវិភាគនិងស្រាវជ្រាវរបស់ភ្នាក់ងារអន្តរជាតិមួយ បានបង្ហាញថា ក្នុង 2013 នេះការផ្សព្វផ្សាយពាណិជ្ជកម្ម Online ទូទាំងពិភពលោកមានទំហំទឹកប្រាក់ រហូតដល់ 9.5 ពាន់លានដុល្លារសហរដ្ឋអាមេរិក។ ហើយចំនួននេះនឹងរឹតតែច្រើនឡើងៗ នាឆ្នាំខាងមុខ។