កាល​ពី​ដើម​សប្ដាហ៍​មុន​ក្រុមហ៊ុន​ Nokia បាន​ប្រកាសចេញ​ជា​ផ្លូវការ​រួចមក​ហើយ​នូវ​ទូរស័ព្ទទំនើប​ប្រភេទ Phablet ដំបូង​របស់​ខ្លួន​ដែល​មាន​អេក្រង់ទំហំ 6-inch និង​ដំណើរការ​ដោយ​ប្រព័ន្ធប្រតិបត្តិការ Windows Phone 8 គឺ​ទូរស័ព្ទ Lumia 1520 និង Lumia 1320
ដោយឡែក​នៅ​ខណៈ​ដែល​ទូរស័ព្ទទំនើប​ទាំង​ពីរ​ទើប​តែ​បាន​ចេញ​មិន​ទាន់​បាន​ ប៉ុន្មានខែ​ផង​នោះ​ ពេល​នេះ​រូបភាព​នៃ​ទូរស័ព្ទទំនើប​ប្រភេទ​ Phablet របស់​ Nokia មួយ​ម៉ូដែល​ទៀតត្រូវ​បាន​លេចចេញ​មុន​ថ្ងៃ​ប្រកាស​ចេញ​ជា​ផ្លូវការ​ដោយ​ ក្រុមហ៊ុន​ ។ ទូរស័ព្ទទំនើប​មួយ​នោះ​គឺ Nokia Lumia 929 ហើយ​បើ​យោ​ង​តាម​ប្រភព​ពី​គេហទំព័រ TheVerge បាន​ឲ្យ​ដឹង​​ខ្លះៗ​ពី​លក្ខណសម្បត្តិ​បច្ចេកទេស​របស់​ Nokia Lumia 929 ដែល​មាន​ដូច​ជា៖ អេក្រង់ទំហំ 5-inch កម្រិតភាពច្បាស់ 1,080p Full HD កាមេរ៉ាទំហំ 20 MP PureView រីឯ​ប្រភព​មួយ​ទៀតដែល​ចេញ​កាល​ពី​ចុង​ខែកញ្ញា បាន​​រំពឹង​ថា​ទូរស័ព្ទទំនើប​មួយ​នេះ​នឹង​​មាន​​​អេក្រង់ទំហំ​ប្រហែល​ 4.5-inch ទៅ 5-inch ជា​មួយ​កម្រិតភាពច្បាស់ 1,080p (Full HD) កាមេរ៉ា​ទំហំ 20 MP PureView (មាន​ Carl Zeiss lens) ។ លក្ខណសម្បត្តិបច្ចេកទេស​មួយ​ចំនួន​ទៀត​រួម​មាន៖ បច្ចេកវិទ្យា NFC, LTE, Wi-Fi 802.11 ac Bluetooth 4.0​ និងដំណើរការ​ដោយ Windows Phone 8 ។

សូម​បញ្ជាក់​ថា​លក្ខណសម្បត្តិបច្ចេកទេស​ទាំង​នេះ​មិន​ទាន់​ត្រូវ​បាន​ បញ្ជាក់​ជា​ផ្លូវការ​ដោយ​ក្រុមហ៊ុន​ Nokia នៅ​ឡើយទេ វា​គ្រាន់​តែ​ជា​ការ​រំពឹង​ទុក​របស់​ប្រភព​ខាង​លើ​តែ​ប៉ុណ្ណោះ ចំពោះ​លក្ខណសម្បត្តិបច្ចេកទេស​ពិត​យ៉ាងណា​របស់​ Nokia Lumia 929 សូម​ប្រិយមិត្ត​រង់ចាំ​តាមដាន​ជា​មួយ​យើងខ្ញុំ ៕